Mar 14 | ZomZIV | STEP | Tu-in Paisan-pawi le Silngo-sawhloh Anlum Pawi ding ni nih bekin a sap laitakin, siampi makaite le thukham siate in, Jesu mansima thahlup theih nading lampi a zong uh hi.

Mark 14

Bethany ah Jesu Sathau Kinilh

1 Tu-in Paisan-pawi le Silngo-sawhloh Anlum Pawi ding ni nih bekin a sap laitakin, siampi makaite le thukham siate in, Jesu mansima thahlup theih nading lampi a zong uh hi. 2 Amaute in, “Mipite hong so kha ding ahi ciangin Pawi sungin hih kei ni,” a ci uh hi. ^a

3 Bethany a Miphak Simon kici pa inn-a sabuai tungah Jesu kingama a om laitakin a manpha mahmah nard kia kibawl sathau namtui suangngo thawl khat tawi-in numei khat ama kiangah a pai hi. Tuanu in a thawl sukham a Jesu lutang tungah sathau namtui a buak hi.

4 Tua lai-a om mi kimkhat lungkim lo uh a, “Sathau namtui pammaih lel hi lo hiam? 5 Kizuak leh kumkhat thaman ^{▼▼14.5 Greek sumin denarii za thum} sanga tamzaw kikhawng ding hi, tua sum mizawngte piakhuai zaw hi,” a kici uh hi. Tua ciangin amaute in tuanu a taigawp uh hi. ^c

6 Jesu in, “Hih nu bangmah cih dah un. Bang hang buaisak na hi uh hiam? Amah in kei tungah a kilawm na khat a sem khin hi. 7 Note tawh mizawngte a om khawm den ding uh a, na ut hunhunun amaute na huh thei uh hi. Ahi hangin kei note tawh ka omkhawm den kei ding hi. 8 Hih nu in ama hih theih bang a hih zo hi. Ka pumpi sathau namtui hong buah ciangin kei kivui nading bawlkhol ahi hi. 9 Thutak kong geninah, lungdamna-thu a kihilhna leitung mun khempeuhah tuanu a kiphawkna in ama hihsa thu zong a kigen ding hi,” a ci hi.

10 Tua ciangin Jesu lehek dingin Sawm-le-nihte lakah khat, Judas Iscariot, siampi makaite kiangah a va pai hi. 11 Amaute in hih thu a zak uh ciangin lungkim mahmah uh a, ama tungah sum piak dingin a kamciam pah uh hi. Tua hi-a amah in amaute khutah Jesu a piak thei nading hun hoih a ngak gige hi.

Topa’ Nitak-an

12 Silngo-sawhloh Anlum Pawi ni masa pen ni Paisan tuuno-a biakna a kipiak ngei hunin Jesu nungzuite in ama kiangah, “Paisan-pawi bawl nading koi lai-ah pai-in na bawlkhol le ung na deih hiam?” ci-in a dong uh hi. ^d

13 Tua ahi ciangin amah in a nungzuite nih sawla, amaute kiangah, “Khuapi sungah pai le uh cin tuibel khat a pua pasal khat tawh na kituak ding uh hi. Tuapa na zui un. 14 Ama lutna inntekpa kiangah, ‘Siapa in: Ka nungzuite tawh Paisan-pawi ka bawl nading, ka zintunna inndei koi lai ahi hiam, ci-in hong dongsak hi,’ va ci un. 15 Amah in van zat ding a kima om, a kipuahsa inndei tungnung a zaipi khat note hong lak ding hi. Tua lai-ah ei adingin na kisakhol un,” ci-in a vaikhak hi.

16 Tua nungzuite gel paikhia uh a, khuapi sungah a lut uh ciangin Jesu gensa bang tektek in a mu uh hi. Tua hi-a amaute in Paisan-pawi bawl nading a na kisakhol uh hi.

17 A nitak ciangin Sawm-le-nihte tawh Jesu a tung hi. 18 Amaute sabuai ah kingamin an a nek laitakun amah in, “Thutak kong geninah, an ka nek khawmpih note lakah khat in kei hong lehhek ding hi,”a ci hi.

19 Amaute lungsi dedu uh a, ama kiangah, “Kei hi buang kei ning maw?” ci-in khat khatin a dong uh hi.

20 Amah in, “Sawm-le-nihte lakah khat ahi hi; tuapa kei tawh kuangkum-a anlum a diahkhawm pa ahi hi. 21 Ama’ thu a kigelhsa bangin Mihing Tapa a pai ding hi. Ahi hangin Mihing Tapa a lehhek pa in gimna nak thuak nazen incia! Amah a piang vet lo hileh ama adingin hoihzaw ding hi,” a ci hi.

22 Amaute in an a nek laitakun Jesu in anlum la-a, lungdam ko-in balkhama, a nungzuite pia in, “Hih, ka pumpi ahi hi, la unla ne un,” a ci hi. ^e

23 Tua khit ciangin hai la-in lungdam ko-a amaute pia-in amaute in tua hai panin a dawn ciat uh hi.

24 Amah in amaute kiangah, “Hih in mi tampi ading ^{▼▼14.24 Khutgelh pawlkhatah a thak} kibuakhia thukhunna ka sisan ahi hi. 25 Thutak kong geninah, Pasian gam sungah a thaka ka dawn ni mateng tu-a kipan lenggahzu ka dawn nawn kei ding hi,” a ci hi.

26 Amaute in biakna la a sak khit uh ciangin Olive Vum manawhin a paikhia uh hi.

Jesu in Peter Nial ding Genkhol

27 Tua khit ciangin Jesu in amaute kiangah,

“‘Tuucingpa ka sat dinga, tuuhonte kithehthang ding hi,’ ^{▼▼14.27 Zec. 13:7}
ci-a kigelhsa bangin note na vekpi un na pukmang ding uh hi.

28 Ahi hangin ka thawh kik khit ciangin note mai Galilee ah ka na pai ding hi,” ci-in a gen hi. ^h

29 Peter in, “Adang teng khempeuh a pukmang zongin kei ka puk kei ding hi,” ci-in a pulakkhia hi. ⁱ

30 Jesu in, “Thutak kong geninah, tuni, tuzan mahmah ak nihvei ^{▼▼14.30 Khutgelh masa pawlkhatah nihvei cih nei lo hi} a khuan ma-in nang tektek in thumvei nong kitheihmawhbawl ding hi,” ci-in a dawng hi.

31 Ahi hangin Peter in, “Nang tawh sihkhawm ding ahi zongin nang kong kitheihmawhbawl ngei kei ding hi,” a ci teitei hi. Adangte khempeuh in zong tua mah a ci ciat uh hi. ^k

Gethsemane

32 Amaute Gethsemane kici mun ah pai uh a, Jesu in a nungzuite kiangah, “Thungen-a ka pai kalin hih lai-ah na tu un,” a ci hi. 33 Amah in Peter, James le John-te tonpih a lungdong ngeungau-in a lungkham mahmah hi. 34 Amah in amaute kiangah, “Dahluatna in sih nading zah in hong zen hi. Hih lai-ah na om unla, na kigalging un,” a ci hi. ^l

35 Tawmkha pailai-in lei-ah bok a, ahi theih leh tua hun tawh a kipelh nadingin thu a ngen hi. 36 “Abba ^{▼▼14.36 Aramik kamin Pa}, Pa aw, nang adingin na khempeuh hi thei hi. Hih hai kei kiang panin hong lakkhiatsak in. Ahi zongin kei deihna bang hi loin nangma deihna bang hizaw hen,” a ci hi. ⁿ

37 Tua khit ciangin a nungzuite kiangah a pai kik leh amaute ihmu sa a om a mu hi. Amah in Peter kiangah, “Simon aw, ihmu na hi hiam? Nai khat sung beek kigalging zo lo na hi hiam? 38 Zia-etna na thuak loh nadingun kigalgingin thu na ngen un. Kha a ut hangin pumpi a thanem hi,” a ci hi.

39 Khatvei paikhia leuleu-a, a ngetsa mah bangin a ngen hi. 40 Amah a pai kik ciangin amaute ihmut suak lua uh ahi manin a ihmut laitak uh a tuak leuleu hi. Amaute in ama kiangah a gen ding uh a thei kei uh hi.

41 A thumveina va pai kika, amaute kiangah, “Note ihmu lailai-in tawlnga lailai na hi uh hiam? Pha zo ta! A hun hong tung ta hi. En un, mawhneite khut sungah Mihing Tapa a kilehhek hun hong tung petmah hi. 42 Tho un! Pai ta ni! Kei hong lehhekpa hih lai-ah hong pai ta hi!” a ci hi.

Jesu Kiman

43 Tua banga a paupau laitak, Sawm-le-nihte lakah khat Judas a kilang hi. Siampi makaite, thukham siate le upate sawl namsau le khetbuk tawi mihon amah tawh a tonkhawm uh hi. ^o

44 Tua a lehhekpa in, “Ka nappa pen amah hi ding hi; tuapa man pah unla, cingin paikhiatpih un,” ci-in amaute tawh lim a kilakkhol khin hi. 45 Jesu kiangah Juda paipah a, “Rabbi aw!” ci-in Jesu a nam hi. 46 Tua mite in Jesu lencipin a man uh hi. 47 Tua laitakin a gei-a dingte khat in a namsau dokin tulpipa nasempa a sat leh a bil langkhat a satkhia hi.

48 Jesu in, “Kei man dinga namsau le khetbuk tawh nong kuan zawzen uh, kumpi langpangte makai ka hi hiam? 49 Nisimin biakinnpi tualte ah thu ka hilh laitakin nong man kei uh hi. Ahi hangin Laisiangtho a tangtung pelmawh ding mah ahi hi,” a ci hi. 50 Tua ciangin mi khempeuh amah nusia-in a taimang uh hi. ^p

51 Saihadial puanza khat longal puan dang a silh lo tangval khat in zong Jesu a zui hi. Amaute in amah a mat uh ciangin, 52 amah in a puanza nusia in a guaktang in a tai hi.

Sanhedrin Mai-ah

53 Amaute in tulpipa kiangah Jesu paipih uh a siampi makaite, upate le thukham siate khempeuh a kikhawm uh hi. 54 Peter in tulpipa inntual ciang tektek a kihal simsimin Jesu a zui hi. Tua laitakah amah a cingte tawh mei awi-in a va tukhawm hi.

55 Siampi makaite le Sanhedrin buppi in Jesu a thah theih nadingun langpangin paulap a zon uh hangin khat beek a mu kei uh hi. 56 Ama langah mi tampi dingin zuau teci a pan uh hangin a thugente uh a kituak kei hi.

57 Tua ciangin mi pawlkhat dingin ama langah hih zuau teci pang uh a, 58 “Amah in, ‘Mihing khuta kibawl hih biakinnpi ka susia dinga, mihing khuta kibawl lo adang khat nithum sungin ka lam kik zo ding hi,’ a cih ka za uh hi,” a ci uh hi. 59 Tua bang hi napi amaute teci panna a kituak kei lailai hi. ^q

60 Tua ciangin amaute mai-ah tulpipa dingin Jesu kiangah, “Dawng lo ding na hi hiam? Na langkhata hihte tecipanna bang hiam?” ci-in a dong hi. 61 Ahi hangin Jesu in dawng loin a dai dide hi. ^r

Tua ciangin tulpipa in ama kiangah, “Nang Thupha Ngahpa’ Tapa Christ ^{▼▼14.61 Ahikeh Messiah} na hi hiam?” ci-in a dong kik hi. ^t

62 Jesu in, “Ka hi hi. Note in Thahat Pa taklama tu meiipi tunga hong paisuk Mihing Tapa na mu ding uh hi,” a ci hi. ^u

63 Tulpipa in a puansilh balkek a, “Teci dang kul nawn ding ahi hiam? 64 Pasian a gendaina na za zo uh hi. Bang na ci ngaihsut uh hiam?” ci-in a dong hi.

Amaute in amah sihsak thamin a mawhpaih uh hi. 65 Tua ciangin pawlkhat in amah cilphih uh a, a mai tuamin a khuttum uh tawh tumin, “Hong gen in!” a ci uh hi. Tua ciangin a cingte in amah tonpih in a sat uh hi. ^v

Peter in Jesu Kitheihmawhbawl

66 A nuai innpi tualah Peter a om laitakin tulpipa nasem numeite khat a kiangah va pai hi. 67 Tuanu in Peter mei-awi a muh ciangin amah a va nai et mahmah hi.

“Nang zong tua Nazareth mi Jesu tawh na kipawl hi,” a va ci hi.

68 Ahi hangin aman a nial hi. Amah in, “Na thugen ka thei kei-a, a pianzia zong ka thei beek kei hi,” ci-in kong pua ah a kihemkhia hi. ^{▼▼14.68 Khutgelh masa pawlkhatah lutnakong le ak a khuang hi}

69 Tua numei mah in tua lai-a om a muh ciangin a kima dingte kiangah, “Hih pa amaute lakah khat ahi hi,” a ci kik hi. 70 Amah in a nial leuleu hi.

Tawlkhat khit ciangin a gei-a dingte in Peter kiangah, “Amau pawlte lakah khat na hi taktak hi. Galilee mi na hi ngel ve leh,” a ci uh hi.

71 Tua ciangin amah le amah kihamsiat in, “Na gen uh hih mipa ka thei peuhmah kei hi,” ci-in a tomlo hi.

72 Tua khit phetin a nihveina ^{▼▼14.72 Khutgelh masa pawlkhatah nihvei cih om lo hi} ak a khuang hi. Tua ciangin Peter in Jesu in a ma tunga, “Ak nih vei ^{▼▼14.72 Khutgelh masa pawlkhatah nihvei cih om lo hi} a khuan ma-in thum vei nong kitheihmawhbawl ding hi,” ci-a a gensa a phawk hi. Tua ciangin amah ki-ip zo nawn loin a kapkhia hi. ^z